Ministrja në detyrë e Kulturës dhe Turizmit, Saranda Bogujevci, ka uruar organizatorët e DokuFest në prag të edicionit jubilar të festivalit, duke theksuar rëndësinë e tij në jetën kulturore të Kosovës. Për 25 vjet me radhë, DokuFest ka kthyer Prizrenin në “kryeqendrën e filmit dokumentar”, duke e bërë këtë ngjarje një prej më të rëndësishmëve në vend dhe më gjerë. Edicioni i sivjetmë do të sjellë 104 filma në garë dhe do të zgjasë nëntë ditë, ku Prizreni do të presë publikun, autorët dhe mysafirët nga vende të ndryshme të botës. Bogujevci i ka uruar suksese ekipit të festivalit dhe ka vlerësuar ndikimin e tij në jetën kulturore dhe zhvillimin e qytetit.