Është publikuar traileri zyrtar i dokumentarit “Pinocchio’s Harvard”, i regjisorit Valmir Tertini, që sjell historinë e picerisë ikonike pranë Universitetit të Harvardit, një vend takimi për studentë, profesorë dhe figura të njohura si Bill Gates, Mark Zuckerberg, Matt Damon dhe Ben Affleck. Dokumentari përmban kuriozitete nga historia e picerisë dhe rrëfime për klientët e saj të famshëm, duke e kthyer këtë vend në një simbol kulturor dhe akademik. Projekti ka marrë vlerësime të rëndësishme në festivalet ndërkombëtare, ku Tertini është nderuar me çmime për regjinë dhe dokumentarin më të mirë të shkurtër, duke u përfshirë edhe në aktivitetet e Festivalit të Filmit në Venecia. Gjithashtu, kompania e regjisorit, vivFilms, ka zgjeruar bashkëpunimet ndërkombëtare me CinemaSet dhe është pjesë e organizatës ITA.C.A., duke i dhënë projektit një dimension më të gjerë në industrinë audiovizive italiane dhe botërore.