Kryeministri i Shqipërisë, Edi Rama, prezantoi librin e tij të ri “Në sofrën e hënës”, një përmbledhje refleksionesh dhe përvojash nga iftarët e shtruar gjatë periudhës së Ramazanit në funksionin e Kryeministrit. Ai uroi të gjithë besimtarët muslimanë për agjërimin dhe theksoi rëndësinë e iftarit si një hapësirë bashkimi dhe dialogu shoqëror, që tejkalon dallimet fetare dhe kulturore në Shqipëri. Libri, i cili përmban pasthënien e profesorit Besnik Sinani dhe parathënien e ministrit të Jashtëm të Emirateve të Bashkuara Arabe, Abdullah Bin Zayed Al Nahyan, synon të nxjerrë në pah dimensionin kulturor, social dhe shpirtëror të traditës së iftarit. Ideja për këtë botim lindi nga miq dhe bashkëpunëtorë myslimanë të Ramës, të cilët e inkurajuan të përmbledhë reflektimet e këtyre mbrëmjeve të veçanta.