Ushtruesja e detyrës së Presidentes së Republikës së Kosovës, Albulena Haxhiu, vizitoi ekspozitën personale “Dalja N’dritë” të fotografit Hazir Reka, e cila dokumenton periudhën e rëndësishme 1988–1989 në Kosovë. Ekspozita përfshin momente të protestave qytetare, grevave të minatorëve të Trepçës dhe rezistencës së qytetarëve në kohë sfiduese, duke i dhënë një vend të veçantë sakrificës dhe guximit të minatorëve si simbol i qëndresës. Haxhiu theksoi se këto fotografi përbëjnë një dëshmi të çmuar të rrugëtimit të Kosovës drejt lirisë dhe shtetndërtimit, duke ruajtur kujtesën kolektive dhe nderuar kontributin e atyre që sakrifikuan. Ajo gjithashtu vuri në pah rëndësinë e ruajtjes së historisë si një detyrë institucionale dhe shoqërore për të mbajtur gjallë kujtimin e momenteve vendimtare të vendit.