Posta e Kosovës ka lansuar një emision të ri filatelik me titullin “Engjëjt e Lirisë – shtatorja ‘Leotrimi i vogël’”, në shënim të Ditës Ndërkombëtare të Fëmijëve Viktima të Pafajshëm të Agresionit. Ky emision i dedikohet kujtimit të fëmijëve që humbën jetën gjatë luftës në Kosovë dhe synon të ruajë kujtesën historike, duke promovuar vlerat e paqes dhe të të drejtave të fëmijëve. Pulla postare paraqet shtatoren “Leotrimi i vogël”, simbol i kujtesës për Leotrim Ahmetin, një fëmijë viktimë e luftës, dhe është realizuar me mbështetjen e Komunës së Skenderajt. Përmes këtij motivi filatelik, Posta e Kosovës thekson rëndësinë e mbrojtjes së fëmijëve dhe ndërtimit të një shoqërie të bazuar në paqe, dinjitet dhe solidaritet, ndërsa emisioni do të qëndrojë në qarkullim deri në konsumimin e plotë.