Ushtruesja e detyrës së presidentes së Kosovës, Albulena Haxhiu, priti në oborrin e Kuvendit grupet folklorike dhe ansamblet nga Franca, Holanda, Turqia, Bullgaria, Hungaria, Greqia, Meksika dhe Kosta Rika, të cilat po marrin pjesë në edicionin e pestë të Festivalit Ndërkombëtar të Folklorit NEWBORN Kosova. Gjatë këtyre ditëve, këto grupe po prezantojnë kulturën, muzikën dhe vallet tradicionale të vendeve të tyre, duke kthyer Kosovën në një pikë takimi të traditave dhe miqësisë ndërkombëtare. Në fjalën e saj të mirëseardhjes, Haxhiu theksoi rëndësinë e bashkëpunimit kulturor dhe rolin e festivaleve si NEWBORN në ndërtimin e urave bashkëpunimi përtej kufijve. Ajo uroi artistët për paraqitjet e tyre dhe falënderoi organizatorët për përkushtimin në promovimin e Kosovës në arenën kulturore ndërkombëtare.