Orkestra Harkore e Filharmonisë së Kosovës do të mbajë sonte koncertin e saj të parë në Vjenë, nën drejtimin e dirigjentit Edon Ramadani. Ngjarja organizohet në bashkëpunim me Ambasadën e Kosovës në Austri dhe do të zhvillohet në ora 19:00 në Haus der Industrie – King’s Hall. Në program do të interpretohen vepra nga Felix Mendelssohn, Drinor Zymberi dhe Valton Beqiri, me pjesëmarrjen e sopranove Arta Jashari dhe Zana Abazi – Ramadani. Ky koncert shënon prezantimin e parë të Filharmonisë së Kosovës në kryeqytetin austriak dhe është pjesë e aktiviteteve përkujtimore të 18-vjetorit të Pavarësisë së Kosovës.