Sunny Hill Festival ka reaguar lidhur me flamingon rozë që u vendos në parkun e festivalit dhe që ka shkaktuar diskutime të shumta në rrjetet sociale. Festivali e ka prezantuar këtë flamingo si një element artistik dhe pjesë të historisë vizuale të Dua Lipës, duke theksuar se ajo ka shoqëruar karrierën e saj që nga viti 2018, kur u shfaq për herë të parë në Billboard Music Awards. Flamingoja u bë pjesë e identitetit të Dua Lipës në videoklipin “New Rules” dhe më pas u integrua në Sunny Hill Festival në vitin 2022, me një ndryshim estetik, për t’u rikthyer sërish në parkun e festivalit në vitin 2024. Reagimi i festivalit erdhi pas interpretimeve në rrjet ku disa e lidhën flamingon me protestat e fundit në Shqipëri, të njohura si “Revolucioni Flamingo”, por Sunny Hill e ka cilësuar atë thjesht si një vepër arti dhe një ikonë dizajni pa kuptime të tjera politike.