Kryeministri në detyrë, Albin Kurti, vlerësoi ekspozitën personale “Dalja n’dritë” të fotografit Hazir Reka, duke theksuar se këto fotografi rikthejnë momentet kyçe të historisë së afërt të Kosovës. Ai përmendi veçanërisht vitet 1988 dhe 1989, kur protestat dhe grevat e minatorëve shënuan një periudhë të rëndësishme të luftës për liri, drejtësi dhe barazi. Kurti nënvizoi se përmes objektivit të Rekës është krijuar një arkiv i çmuar i kujtesës kolektive, që dokumenton rezistencën dhe kontributin e minatorëve dhe qytetarëve në rrugëtimin drejt Republikës. Ekspozita u cilësua si një nderim dhe mirënjohje për ata që dhanë kontribut në këto procese historike dhe për vetë autorin e fotografive.