Shërbimi Korrektues i Kosovës mori pjesë në Javën e Nënë Terezës 2026, ku në Muzeun e Nënë Terezës në Prizren u organizua një ekspozitë me punime artistike të grave nga Qendra Korrektuese për Femra në Lipjan. Kjo ekspozitë, e fokusuar në temën e bamirësisë, prezantoi rezultatet e aktiviteteve kreative dhe programeve rehabilituese që synojnë zhvillimin e aftësive dhe fuqizimin e grave të privuara nga liria. Drejtori i Qendrës Korrektuese për Femra, Ylber Topalli, përfaqësoi SHKK-në në këtë aktivitet, duke theksuar rëndësinë e promovimit të punës kreative si një mënyrë për përgatitjen dhe riintegrimin e këtyre grave në shoqëri. Të hyrat nga shitja e punimeve do t’u dedikohen drejtpërdrejt autoreve, duke e bërë këtë iniciativë një shembull konkret të mbështetjes dhe përkushtimit për rehabilitimin dhe integrimin e tyre në komunitet.