Haxhilerët kosovarë po kryejnë sot ritualin më të rëndësishëm të Haxhit, qëndrimin në rrafshnaltën e Arafatit, i cili konsiderohet shtylla kryesore e këtij obligimi fetar. Gjatë qëndrimit në Arafat, ata falën namazin e drekës dhe të ikindisë së bashku, me udhëheqjen e kryeimam Vedat Sahiti dhe ligjëratën e Agim Hysenit nga Bashkësia Islame e Kosovës. Pas këtij momenti, haxhilerët do të nisen drejt Muzdelifes për të kaluar natën dhe përgatitur ritualin e gjuajtjes së xhemarateve në Mina, që shënon fillimin e festës së Kurban Bajramit. Ritet e Haxhit do të vazhdojnë me therjen e kurbanit, rruajtjen e flokëve dhe tavafin rreth Qabesë, duke përmbyllur kështu një nga detyrimet më të shenjta për myslimanët.