Në shënim të Ditës së Çlirimit të Republikës së Kosovës, Biblioteka Kombëtare “Pjetër Bogdani” në bashkëpunim me organizatën Heartstone ka hapur ekspozitën fotodokumentare “KFOR and Kosova +25”. Kjo ekspozitë sjell përmes fotografive të dokumentarit britanik Nick Sidle një rrëfim njerëzor mbi periudhën pasluftës, duke përfshirë angazhimin e forcave paqeruajtëse të KFOR-it dhe jetën e qytetarëve gjatë viteve të rindërtimit. E prezantuar fillimisht në vitin 2001, ekspozita është rikthyer në një formë të restauruar dhe të zgjeruar, duke ftuar publikun në reflektim mbi rëndësinë e paqes dhe kujtesës kolektive. Ky projekt synon të theksojë sfidat, shpresat dhe përvojat e komunitetit kosovar në rrugën e bashkëjetesës dhe rindërtimit pas luftës.