Libri për fëmijë “Kur yjet zbresin në dhomë” është promovuar si një vepër me tre tregime që trajtojnë me ndjeshmëri sfidat dhe emocionet e fëmijëve që përballen me sëmundje të rënda. Libri përqendrohet në tema si frika, shpresa, dashuria dhe fuqia e imagjinatës, duke ofruar një mesazh të fortë emocional dhe edukativ për këtë kategori të veçantë lexuesish. Para promovimit zyrtar, libri iu dorëzua fëmijëve në Repartin e Onkologjisë në Qendrën Klinike Universitare të Kosovës, ku ata patën mundësinë të takoheshin me autorët dhe organizatorët. Në panelin promovues, autorja Mjedra Bajraktari dhe psikologia Xhevahire Balaj theksuan rëndësinë terapeutike të literaturës për fëmijët në situata të vështira, duke e konsideruar këtë projekt një ndërthurje të artit letrar me ndjeshmërinë sociale për të sjellë shpresë dhe mbështetje.