Të shtunën, më 12 shtator, do të mbahet Marshi madhështor i platformës “Liria ka Emër”, i cili pritet të mbledhë një numër të madh qytetarësh dhe të zhvillohet vetëm katër ditë para shpalljes së aktgjykimit për katër krerët e Ushtrisë Çlirimtare të Kosovës në Hagë. Organizatorët Ismail Tasholli dhe Eliza Hoxha kanë paralajmëruar një program të veçantë, ku performanca muzikore do të pasurohet nga dy emra të njohur të muzikës patriotike shqiptare, Arif Vladi dhe Shkurte Fejza. Arif Vladi, i njohur për interpretimet e tij kushtuar Ushtrisë Çlirimtare të Kosovës, dhe Shkurte Fejza, e lidhur prej vitesh me këngët për luftën dhe patriotizmin, do të jenë pjesë qendrore e këtij marshimi. Përmes këtij eventi, platforma “Liria ka Emër” synon të përcjellë mesazhin e mbështetjes për vlerat e luftës dhe për figurat që po përballen me procesin gjyqësor në Hagë, duke krijuar një atmosferë të veçantë dhe spektakolare.