Ministria e Kulturës dhe Turizmit ka njoftuar mbylljen përkohësisht të disa zonave të Kalasë së Prizrenit për shkak të gjendjes së rënduar të disa strukturave që paraqesin rrezik për vizitorët. Ky vendim është marrë pas vlerësimeve profesionale dhe ka për qëllim mbrojtjen e trashëgimisë kulturore dhe sigurinë e qytetarëve. Zonat e rrezikuara do të jenë të shënuara dhe të kufizuara deri në një njoftim të mëtejshëm, ndërsa pezullohet edhe dhënia në shfrytëzim e hapësirave të kalasë për aktivitete nga organizata, iniciativa kulturore dhe artistë të pavarur. Ministria ka kërkuar mirëkuptim nga publiku dhe ka premtuar informim të vazhdueshëm për çdo zhvillim dhe afatet e mundshme të rihapjes.