Edicioni i nëntë i MIK Festival ka nisur në Korçë, duke sjellë për katër ditë me radhë një program të pasur me artistë shqiptarë dhe ndërkombëtarë nga zhanre të ndryshme muzikore. Nata e parë u hap me tingujt e muzikës Gypsy Jazz, ku artisti Xavier Nikq, me origjinë gjysmë shqiptare dhe gjysmë franceze, performoi në kontrabas, duke përzier elemente të xhazit francez dhe Gypsy Jazz. Sopranoja me famë botërore Inva Mula, drejtuese artistike e festivalit, shprehu kënaqësinë që festivali filloi me një koncert jazz nga Morina Trio, duke hapur një dritare të re drejt këtij zhanri të veçantë dhe duke synuar të mbajë publikun gjithmonë me kërshëri. Hapësirat historike të Korçës po shndërrohen në një skenë të hapur muzikore, ku kultura dhe rrymat muzikore evropiane bashkohen për të krijuar një atmosferë festive dhe magjike.