Ministria e Kulturës, Rinisë dhe Sportit njoftoi miratimin e projektit të ndërhyrjeve në Rrugën “Qamil Hoxha” në Prishtinë, pas aprovimit nga Instituti i Kosovës për Mbrojtjen e Monumenteve (IKMM). Projekti zhvillohet brenda zonës mbrojtëse të Qendrës Historike të Prishtinës dhe pranë aseteve të regjistruara në trashëgiminë kulturore arkitekturore, duke u zbatuar në përputhje të plotë me bazën ligjore. Ministria theksoi rëndësinë e marrjes së lejeve të shkruara nga institucionet kompetente për çdo ndërhyrje në zona të mbrojtura dhe paralajmëroi masa ligjore ndaj shkelësve, duke përfshirë edhe rastet kur vet ajo ka vepruar si investitore. Gjithashtu, Ministria ripërsëriti gatishmërinë për bashkëpunim me të gjitha palët për të siguruar që projektet të zhvillohen në harmoni me kriteret profesionale të ruajtjes dhe mbrojtjes së trashëgimisë kulturore.