Në Universitetin “Isa Boletini” në Mitrovicë u organizua një Akademi Përkujtimore në nder të historianit të njohur Ibrahim Çitaku, në 1-vjetorin e ndarjes së tij nga jeta. Në këtë ceremoni morën pjesë personalitete të jetës publike, profesorë, historianë, bashkëpunëtorë, miq dhe familjarë të tij, të cilët përkujtuan jetën dhe veprën e tij të pasur. Profesor Selman Mehaj theksoi qëndrimin stoik të Çitakut dhe përkushtimin e tij në zbardhjen e figurave kombëtare, ndërsa profesoresha Sala Ahmeti vuri në pah disiplinën shkencore dhe rëndësinë e veprës së tij. Profesor Vehbi Xani kritikoi institucionet për mungesën e përkujdesjes ndaj figurës së Çitakut dhe kërkoi më shumë vëmendje për trashëgiminë e tij. Akademia u pasurua me dy pika artistike me violinë nga nxënësi Oltion Musliu, ndërsa në fund përshëndetjen dhe falënderimet i bëri bija e profesorit, doktoresha Vjolla Çitaku.