Ushtruesja e detyrës së presidentes së Kosovës, Albulena Haxhiu, ka vizituar Muzeun “Eksodi ‘99” në Stacionin e Trenave në Prishtinë, një ekspozitë e themeluar nga “Reporting House” që dokumenton dëbimin masiv të shqiptarëve gjatë pranverës së vitit 1999. Ekspozita është vendosur brenda një vagoni treni dhe përmes 48 rrëfimeve autentike të të mbijetuarve, të organizuara në katër tema kryesore, ofron një përjetim domethënës që kontribuon në ruajtjen e kujtesës kolektive dhe edukimin e brezave të rinj. Haxhiu theksoi rëndësinë e kësaj iniciative për dokumentimin e një kapitulli të rëndësishëm të historisë së Kosovës dhe për nderimin e përvojave të atyre që përjetuan ngjarjet e vitit 1999. Kjo ekspozitë sjell një dëshmi të fuqishme të përjetimeve, sfidave dhe qëndresës së qytetarëve gjatë dhe pas luftës në Kosovë.