Nënkryetarja e Kryeqytetit, Besiane Musmurati, ka paralajmëruar fillimin e programit veror “n’Lagje”, i cili gjatë muajit gusht do të sjellë koncerte me muzikë live në lagjet e ndryshme të Prishtinës. Qëllimi i këtij programi është që kultura të dalë nga qendra dhe të afrohet me komunitetet lokale, duke kthyer hapësirat publike në vende takimi me muzikë, argëtim dhe atmosferë verore. Koncertet do të zhvillohen në lagje si Dardani, Muharrem Fejza, Muhaxherë, Ulpianë, Hajvali, Kolovicë, Bregu i Diellit, Kodra e Trimave, Matiqan dhe Kalabri, duke filluar çdo mbrëmje nga ora 20:00. Artistë të njohur si Nita Latifi, Offchestra, Florent Abrashi dhe String String do të performojnë gjatë këtij programi, i cili synon të pasurojë jetën kulturore dhe të bashkojë komunitetin në çdo lagje të kryeqytetit.