Organizata EC Ma Ndryshe ka ngritur shqetësime lidhur me ndërtimin e një objekti në rrugën “Shën Albani” në Qendrën Historike të Prizrenit, ku janë konstatuar shkelje të projektit të miratuar dhe pëlqimeve institucionale. Qendra Rajonale për Trashëgimi Kulturore dhe Drejtoria e Inspektoratit të Komunës kanë evidentuar ndërhyrje të paautorizuara dhe tejkalime në punimet në terren, duke vendosur masa ndaluese dhe duke nisur procedura ligjore. EC Ma Ndryshe kërkon nga institucionet që të zbatojnë ligjin në mënyrë rigoroze, të informojnë publikun për veprimet e ndërmarra dhe të forcojnë mbikëqyrjen në zonat me rëndësi të veçantë kulturore dhe urbanistike. Organizata thekson se ruajtja e autenticitetit dhe integritetit të Qendrës Historike është një përgjegjësi ligjore dhe qytetare që duhet të respektohet për zhvillim të qëndrueshëm.