Sot në Kosovë dhe në mbarë botën myslimanët festojnë Fitër Bajramin, festën që shënon përfundimin e Muajit të Shenjtë të Ramazanit. Manifestimi kryesor për këtë festë në Kosovë mbahet në Xhaminë e Madhe në Prishtinë, ku programi fillon në orën 05:03 me faljen e namazit të sabahut dhe një ligjëratë tematike nga kryeimami i KBI-së në Ferizaj, Ibrahim ef. Beqiri. Namazi i Fitër Bajramit do të falet në orën 06:18, nën drejtimin e kryeimam Vedat ef. Sahiti, ndërsa hytben e festës do ta mbajë Myftiu i Kosovës, Naim ef. Tërnava, i cili do t’i drejtohet opinionit me mesazhin e kësaj feste. Në ditën e parë të festës, më 20 mars, Kryesia e Bashkësisë Islame të Kosovës organizon pritje urimi në selinë e saj nga ora 09:00 deri në 12:00, duke vazhduar traditën e përvitshme.