Më 17 qershor hapet edicioni i 26-të i Panairit të Librit “Prishtina 2026”, një prej ngjarjeve më të rëndësishme kulturore në Kosovë. Ceremonia e hapjes do të zhvillohet në Pallatin e Rinisë në Prishtinë dhe do të transmetohet drejtpërdrejt në RTK, ndërsa panairi do të zgjasë deri më 21 qershor. Në këtë edicion do të marrin pjesë rreth 100 botues shqiptarë, të cilët do të prezantojnë afro 2000 tituj të rinj dhe rreth 6000 botime të viteve të fundit. Gjatë pesë ditëve do të organizohen mbi 40 aktivitete kulturore, promovime librash dhe takime me autorë vendas e ndërkombëtarë, ku i ftuar nderi do të jetë shkrimtari italo-francez Francesco Rapazzini. Panairi pritet të vizitohet nga rreth 30 mijë qytetarë, studentë dhe nxënës, ndërsa hyrja do të jetë falas për të gjithë vizitorët.