Produksioni The Life Of Sound do të publikojë në qershor dokumentarin muzikor “Urban Underground Unplugged”, i cili përqendrohet në skenën alternative rock në Kosovë dhe sjell përditshmërinë e artistëve urbanë në një stil reality show. Në qendër të projektit është Bashkim Myftari, lideri i ish-grupit Garazhat e Bardha, i cili rikthehet me këngë të reja dhe interpretime unplugged në ambiente urbane, duke përfshirë edhe përpunime moderne të këngëve të vjetra shqipe. Dokumentari përfshin bashkëpunime me artistë të skenës underground, si Anton Krasniqi, dhe një interpretim të veçantë të veprës “Anës Lumenjve” të Fan Nolit, i përshtatur në stil modern. Një veçori e veçantë e këtij projekti është regjistrimi organik i performancave live, pa përdorimin e audio production të avancuar apo inteligjencës artificiale, duke ruajtur kështu emocionin dhe autenticitetin e muzikës.