Ushtruesja e detyrës së presidentes së Kosovës, Albulena Haxhiu, priti në takim themeluesit e televizionit dhe Shkollave Shqipe “Alba Life” në Nju Jork, Qemal dhe Kozeta Zylo, duke i nderuar për kontributin e tyre të jashtëzakonshëm në arsimin shqip në diasporë. Përmes punës së tyre shumëvjeçare, ata kanë krijuar hapësira ku fëmijët shqiptarë mësojnë gjuhën, historinë dhe kulturën e tyre, duke ruajtur lidhjen me atdheun. Angazhimi i tyre ka ndikuar edhe në njohjen zyrtare të gjuhës shqipe nga institucionet e shtetit të Nju Jorkut, një arritje e rëndësishme për komunitetin shqiptar. Në shenjë mirënjohjeje, Haxhiu u dha Medaljen Presidenciale të Meritave dhe një mirënjohje të përbashkët për punën e tyre, duke theksuar rëndësinë e vazhdimësisë së traditës së shqiptarëve në Amerikë për ruajtjen e identitetit kombëtar.