Nxënësit e shkollës fillore të mesme të ulët “Naim Frashëri” nisën ditën e 5 marsit me një aktivitet përkujtimor kushtuar Epopesë së Ushtrisë Çlirimtare të Kosovës. Ora e parë mësimore filloi me shfaqjen e një dokumentari që tregonte sakrificën dhe qëndresën e luftëtarëve të UÇK-së, duke i njohur nxënësit me ngjarjet historike të rëndësishme për Kosovën. Pas dokumentarit, atmosfera u mbush me këngë patriotike dhe rrëfimin emocionues të Besarta Jasharit, mbijetuese e familjes së komandantit Adem Jashari, që i afroi nxënësit më shumë me historinë dhe sakrificën e familjes Jashari. Drejtoresha Merita Haxhiu theksoi se shkolla ka bërë përgatitjet për shënimin e Epopesë së UÇK-së, që zgjat nga 5 deri më 7 mars, duke synuar edukimin e brezave të rinj dhe ruajtjen e kujtesës historike të vendit.