Oda Haliti, artiste dhe DJ nga Kosova, do të performojë në Lyon Biennale, një nga eventet më prestigjioze të artit bashkëkohor në Francë, që fillon më 19 shtator. Kjo është hera e parë që muzika e një artisteje kosovare përdoret në materialet zyrtare të komunikimit të bienales, ku kënga e saj "Lali" është zgjedhur si soundtrack i teaser-it. Performanca e saj përfshin një qasje ndërdisiplinore që lidh kulturën e klubit me kontekstet artistike, duke reflektuar mbi historitë dhe kushtet sociale përmes dëgjimit kolektiv. Përveç Lyon Biennale, Oda do të marrë pjesë edhe në evente të tjera ndërkombëtare si Manifesta Biennial në Gjermani dhe Berlin Beats, duke konsoliduar kështu prezencën e saj në skenën globale të artit bashkëkohor.