Opera e Kosovës shënoi pesëvjetorin e themelimit me shfaqjen e “Diptikut” të Giacomo Puccinit, duke prezantuar dy opera në një akt, “Suor Angelica” dhe “Gianni Schicchi”, në AMC Hall në Prishtinë. Drejtori Meriton Ferizi theksoi se ky produksion përfaqëson një ngritje artistike dhe falë bashkëpunimit me artistë italianë dhe bullgarë, kasti ka fituar përvoja të reja, sidomos në fushën e diksionit dhe interpretimit vokal. Megjithatë, mungesa e një teatri të operës dhe baletit në Kosovë mbetet një sfidë e madhe, duke e detyruar kastin të përdorë mikrofona dhe ambiente të improvizuara, çka nuk është ideale për këtë lloj arti. Baritoni Harris Baraktari nënvizoi se, pavarësisht vështirësive teknike, përgatitjet kanë qenë intensive dhe premiera u prit mirë nga publiku, i cili do të ketë mundësinë ta ndjekë rishfaqjen më 3 korrik në të njëjtin vend.