Orkestra e Fëmijëve dhe të Rinjve "Amadeus" nga Kosova ka fituar medaljen e artë në festivalin ndërkombëtar të orkestrave Musica Orbis në Pragë, duke marrë gjithsej katër çmime të rëndësishme. Përveç çmimit kryesor, orkestrës i janë dhënë edhe çmimi special për violinistin solist Elton Syla, çmimi për violinistin më entuziast Princ Fanaj, si dhe çmimi i publikut dhe adhuruesve. Ky sukses është rezultat i punës së palodhur të dirigjentit Vehbi Shosholli, drejtoreshës Hana Petrovci, zv. drejtoreshës Vanesa Petrovci Shabani, koordinatores Arta Rexhepi dhe gjithë stafit të shkollës "Amadeus". Orkestra falënderon të gjithë për përkrahjen dhe vazhdon të bëjë krenarë Kosovën me talentin dhe përkushtimin e të rinjve të saj.