Posta e Kosovës, në bashkëpunim me Fakultetin e Shkencave Matematike-Natyrore dhe Katedrën e Biologjisë, ka lansuar emisionin e ri të pullave postare me temën "Bimët e shkrepave gurore të Kosovës". Ky emision përfshin dy pulla postare, një bllok filatelik dhe Zarfin e Ditës së Parë, të cilat do të jenë në qarkullim deri në konsumimin e plotë. Bimët e shkrepave gurore përfaqësojnë një florë të veçantë dhe të qëndrueshme, e përshtatur për të mbijetuar në kushte të ashpra dhe janë pjesë e rëndësishme e trashëgimisë botanike të Kosovës. Posta e Kosovës i fton koleksionistët, institucionet dhe qytetarët që t’i shtojnë këto pulla në koleksionet e tyre, duke theksuar rolin e tyre si promovues të vlerave natyrore dhe kulturore të vendit në arenën ndërkombëtare.