Presidenti i Republikës, Bajram Begaj, ka uruar besimtarët bektashinj për festën e Sulltan Novruzit, duke theksuar rëndësinë e kësaj dite si simbol i pranverës, ringjalljes, shpresës, dashurisë dhe unitetit. Ai zhvilloi një vizitë në Selinë e Shenjtë të Kryegjyshatës Botërore Bektashiane, ku u prit nga Kryegjyshi Botëror, Haxhi Dede Baba Edmond Brahimaj, dhe i përcolli urime të përzemërta. Në fjalën e tij, Presidenti Begaj nënvizoi se Sulltan Novruzi përkon me ditëlindjen e Imam Aliut dhe se vlerat e kësaj dite duhet të mishërohen në jetën e përditshme, duke promovuar paqen, dhembshurinë, dashurinë dhe solidaritetin në shoqëri. Ai uroi që kjo festë të shërbejë si thirrje për më shumë harmoni, mirëkuptim dhe bashkëjetesë në të gjithë komunitetin shqiptar.