Kryetari i Prishtinës, Përparim Rama, ka nderuar artistët që do të performojnë në koncertin “Kanga Jonë – Dashni nga Prishtina”, një event i organizuar nën patronatin e Kryeqytetit për të shënuar Ditën e Çlirimit të Prishtinës. Në këtë gala koncert do të marrin pjesë emra të njohur të muzikës shqiptare si Aurela Gaçe, Alban Nimani, Alma Bektashi, Elina Duni, Vesa Luma, Dren Abazi, Jehona Sopi dhe të tjerë, të cilët do të ngjiten në skenë nën dirigjimin e Edon Ramadanit. Përparim Rama theksoi rëndësinë e artistëve në zhvillimin dhe promovimin e jetës kulturore të kryeqytetit, duke falënderuar veçanërisht Jehona Sopinë dhe të gjithë artistët për bashkëpunimin e tyre. Organizatorët dhe artistët shprehën mirënjohje për mbështetjen institucionale dhe publike, ndërsa interesimi për koncertin është jashtëzakonisht i madh, me rreth 2000 ulëse dhe shumë qytetarë që do të ndjekin edhe në këmbë.