Me përmbylljen e edicionit të gjashtë të festivalit “Rame Lahaj & Friends”, Prishtina u shndërrua në një skenë të artit botëror, duke pritur artistë me renome ndërkombëtare që sollën emocione dhe performanca të larta artistike. Kryetari i Prishtinës, Përparim Rama, theksoi se kultura i jep shpirt qytetit dhe e lidh atë me botën, duke e bërë festivalin një ngjarje të rëndësishme që pasuron jetën kulturore dhe forcon imazhin ndërkombëtar të kryeqytetit. Gala Mbrëmja e festivalit, nën moton “Play Music, Not War”, solli në skenë tenorin shqiptar Ramë Lahaj, soprano Vanessa Goikoetxea, mezzo soprano Štěpánka Pučálková dhe bass baritonin Luca Pisaroni, të dirigjuar nga Giuseppe Finzi. Kjo ngjarje kulturore theksoi rëndësinë e bashkëpunimit ndërkombëtar dhe rolin e artit në promovimin e paqes dhe dialogut mes kulturave.