Më 6 maj në Prishtinë do të mbahet një manifestim i veçantë për të festuar ditëlindjen e heroit kombëtar Gjergj Kastrioti Skënderbeu, organizuar nga Organizata “Shqiptaria” në bashkëpunim me partnerët e saj. Në këtë ngjarje do të marrin pjesë delegacione arbëreshe nga Italia, përfshirë komunitete nga Kalabria dhe San Marzano, si dhe pasardhësi i familjes Kastrioti, Loris Castriota. Organizatorët theksojnë se pjesëmarrja e këtyre delegacioneve dëshmon se fryma arbërore dhe trashëgimia e Skënderbeut vazhdojnë të jenë të gjalla ndër breza. Kjo është hera e tretë që organizohet ky event në Prishtinë, i cili po merr përmasa pothuajse kombëtare dhe synon të bëhet një traditë me pjesëmarrje të lartë nga mysafirë specialë dhe vizitorë nga të gjitha trojet shqiptare.