Kryetari i Prishtinës, Përparim Rama, ka zhvilluar një takim me koleksionistët Kaltrina Igrishtën dhe Lekë Shalën për të diskutuar krijimin e një qendre të dedikuar për ruajtjen dhe promovimin e trashëgimisë kulturore dhe historike në kryeqytet. Koleksioni i tyre përfshin mbi 1,500 litografi, qindra artefakte historike, kostume tradicionale dhe materiale arkivore që dokumentojnë identitetin dhe kujtesën kolektive ndër breza. Në fokus ishte edhe përfshirja e Prishtinës në ngjarje kulturore ndërkombëtare, duke përfshirë mundësinë që qyteti të organizojë Bienalen e Tekstilit, një platformë që lidh traditën me artin bashkëkohor dhe kulturat botërore. Rama theksoi se trashëgimia nuk duhet vetëm të ruhet në arkiva, por të marrë jetë dhe vëmendje për t’u ndarë me qytetarët dhe botën.