Festivali ndërkombëtar i teatrit në ambient të hapur, PrizrenFest, u hap me një edicion rekord që zgjat shtatë ditë dhe sjell mbi 20 shfaqje dhe performanca nga artistë nga rajoni, Evropa dhe Amerika e Jugut. Hapja u shënua me spektaklin "Borderless Body", një performancë unike që bashkon teatër fizik dhe vallëzim bashkëkohor mbi lumin Lumbardh, duke krijuar një dialog mes trupit, ujit dhe arkitekturës historike të qytetit. Ushtruesja e detyrës së presidentes Albulena Haxhiu theksoi se Prizreni vetë, me elementët e tij natyrorë dhe historikë, është skenografia më e mirë për këtë festival. Kryetari i Prizrenit, Shaqir Totaj, vuri në dukje se ky festival është një dëshmi e lulëzimit të jetës kulturore në qytet dhe një traditë që po forcohet çdo vit.