Ministrja në detyrë e Kulturës dhe Turizmit, Saranda Bogujevci, ka njoftuar vazhdimin e punimeve restauruese në Xhaminë “Mulla Vesel Guta” në Ferizaj, një monument me rëndësi të veçantë kulturore dhe shpirtërore. Ajo së bashku me kryeministrin Albin Kurti dhe kryetarin e Këshillit të Bashkësisë Islame në Ferizaj, Nexhmedin Bajrami, vizituan nga afër punimet që po zhvillohen me kujdes të veçantë për të ruajtur vlerat autentike të xhamisë. Për këtë projekt janë ndarë 1.5 milion euro, një investim që synon rikthimin e objektit në funksion të plotë për komunitetin dhe garantimin e jetëgjatësisë së tij. Restaurimi po realizohet me qëllim ruajtjen e trashëgimisë kulturore dhe shpirtërore që përfaqëson kjo xhami në Ferizaj.