Gjatë punimeve për ndërtimin e një depoje uji në fshatin Rromës, Bashkia Selenicë, janë zbuluar rrënojat e një çezme të vjetër me vlera të mëdha historike. Specialistët e Drejtorisë Rajonale të Trashëgimisë Kulturore Vlorë kanë kryer verifikimet dhe dokumentimin në terren, duke evidentuar elementë ndërtimorë si tubacione qeramike, kanale shkarkuese dhe mure të ndërtuara me gurë, tjegulla dhe llaç gëlqereje. Bazuar në karakteristikat arkitekturore dhe fragmentet e qeramikës, çezma daton në shekujt XV–XVI, në fillimet e periudhës osmane, duke ofruar një dëshmi të rëndësishme për historinë dhe trashëgiminë kulturore të zonës. Specialistët theksojnë se bashkëpunimi i banorëve me institucionet e trashëgimisë kulturore ka qenë vendimtar për ruajtjen dhe dokumentimin e këtij monumenti historik.