Salla e xhudos e klubit Ippon në Pejë, e ndërtuar tri dekada më parë nga kryemjeshtri Driton Kuka dhe vëllezërit e tij, do të shndërrohet në muze. Kjo sallë është shtëpia e kampionëve olimpikë si Majlinda Kelmendi, Nora Gjakova dhe Distria Krasniqi, si dhe e shumë xhudistëve të tjerë që kanë bërë historinë e xhudos kosovare. Pas ndërtimit të Qendrës Nacionale të Xhudos, ku tani ushtrojnë atletët, salla ikonike u mbyll për renovim dhe do të ruajë tiparet e saj origjinale, duke përfshirë edhe kaminin karakteristik. Ky muze do të përmbajë fotografi dhe objekte të vlefshme nga rrugëtimi i suksesshëm i ekipit kosovar, që ka tërhequr vëmendjen e mediave ndërkombëtare si BBC, AP dhe New York Times.