Sot, më 27 mars, shënohet Dita Botërore e Teatrit, një ngjarje që nga viti 1962 festohet çdo vit për të promovuar artin e teatrit në mbarë botën. Kjo ditë u iniciua me propozimin e Finlandës gjatë Kongresit të 9-të botëror të Institutit Ndërkombëtar Teatror (INT) të UNESCO-s në vitin 1961. Instituti Ndërkombëtar Teatror, themeluar në vitin 1948 nga UNESCO-ja, është organizata më e rëndësishme joqeveritare në fushën e arteve interpretuese dhe ka si qëllim promovimin e këmbimit ndërkombëtar të njohurive dhe bashkëpunimit mes artistëve të teatrit. Përmes kësaj dite, INT synon të stimulojë krijimtarinë, të forcojë mirëkuptimin ndërmjet njerëzve dhe të kontribuojë në paqen dhe miqësinë mes popujve.