Valon Murati së bashku me bashkëluftëtarë dhe miq nga Shoqata “Shtigjet e Lirisë” kanë përshkuar rrugën që Heroi i Kosovës, Bahri Fazliu – Gëzimi, ndoqi në ditën e rënies së tij më 7 maj 1998. Ecja filloi nga shtëpia e familjes Gjonbalaj në Hot të Plavës dhe vazhdoi për rreth 23 kilometra nëpër Alpet Shqiptare, duke përfunduar pranë pllakës përkujtimore afër trekufirit në Deçan. Kjo nismë është përpjekja e parë për të shënuar këtë itinerar si “Shtegu i Bahriut” dhe synon të bëhet një aktivitet tradicional për përkujtimin e rrugëtimit dhe sakrificës së dëshmorëve. Murati thekson se, megjithëse kushtet e ecjes sot janë krejtësisht të ndryshme nga ato të luftës, kjo rrugë mbetet një mënyrë e veçantë për të afruar brezat e rinj me historinë dhe kontributin e dëshmorëve për liri dhe bashkim kombëtar.