Në Bibliotekën Kombëtare të Kosovës u hap ekspozita “Rezistenca në Kosovë 1980–1999 përmes shtypit të fshehtë”, organizuar nga Instituti i Historisë “Ali Hadri”. Ekspozita paraqet një dëshmi të rëndësishme historike të periudhës kur liria e fjalës ishte e ndaluar dhe shtypi i fshehtë shërbeu si mjet i fuqishëm informimi dhe organizimi kombëtar. Drejtoresha Teuta Shala-Peli theksoi se botuesit dhe shpërndarësit e këtyre materialeve vepronin në kushte jashtëzakonisht të rrezikshme, duke rrezikuar lirinë dhe jetën e tyre, ndërsa ekspozita shërben si mirënjohje për kontributin e tyre në ruajtjen e identitetit kombëtar. Organizatorja Dorina Daiu vlerësoi guximin dhe sakrificën e veprimtarëve që përhapën të vërtetën dhe fjalën e lirë, duke ndihmuar në rrugën drejt lirisë dhe pavarësisë së Kosovës.