Shtëpia botuese Logos-A ka publikuar librin e ri të Mehmet Kalisit, drejtor i Tëvë1, me titullin “Sfera publike e lëngshme: Mediet sociale, opinioni publik dhe (pa)mundësia e dialogut Kosovë-Serbi”. Ky libër trajton ndikimin e thellë të mediave sociale në formësimin e opinionit publik dhe rolin e tyre në dialogun ndërmjet Kosovës dhe Serbisë. Autori kombinon reflektimin filozofik me hulumtimin empirik për të treguar se rrjetet sociale nuk janë vetëm platforma komunikimi, por hapësira ku krijohen narrativa dhe perceptime shoqërore. Mehmet Kalisi, gjithashtu profesor dhe moderator i emisionit “Matrix” në Tëvë1, ofron një analizë të thelluar mbi sfidat dhe mundësitë që sjell ky fenomen në marrëdhëniet ndërkombëtare.