Dita Botërore e Ndihmës së Parë, e caktuar çdo vit në të shtunën e dytë të shtatorit, nënvizon rëndësinë e njohjes dhe përdorimit të ndihmës së parë në mbarë botën. Që nga veprimi i parë i Henry Dynant në Solferino, kjo praktikë ka qenë thelbësore për Lëvizjen Ndërkombëtare të Kryqit të Kuq dhe Gjysmëhënës së Kuqe. Një fokus i veçantë i këtij viti është roli i të moshuarve, të cilët shpesh përjashtohen nga shoqëria për shkak të ndjeshmërisë së tyre ndaj sëmundjeve si presioni i lartë i gjakut, sëmundjet e zemrës dhe diabeti. Në situata emergjente, ata janë më të prekshëm, pasi shpesh nuk mund të largohen lehtë nga zonat e rrezikuara, duke rritur nevojën për masa parandaluese dhe trajtim të duhur të ndihmës së parë për të zvogëluar vuajtjet dhe për të shpëtuar jetë.