Ministrja e Kulturës, Saranda Bogujevci, priti në takim ekipin e filmit “Dua” pas suksesit të jashtëzakonshëm në Festivalin e Kanës, ku filmi u vlerësua me çmimin “SACD” në kuadër të “Semaine de la Critique”. Në takim u përgëzua regjisoresha Blerta Basholli dhe gjithë ekipi për këtë arritje të rëndësishme, që tregon nivelin e lartë artistik dhe praninë gjithnjë e më të fuqishme të kinemasë së Kosovës në arenën ndërkombëtare. Ky çmim, i ndarë nga Shoqata e Autorëve dhe Kompozitorëve Dramaturgjikë në Francë, është një dëshmi e fuqisë krijuese të filmbërësve shqiptarë dhe një sukses që i bën krenarë të gjithë. Ministrja Bogujevci theksoi se ky është një hap i rëndësishëm që tregon se kinemaja jonë po zë vend të rëndësishëm në festivalet më prestigjioze botërore.