Në Prishtinë u hap ekspozita “Sy më sy | Eye to Eye” me rastin e Ditës Ndërkombëtare për Eliminimin e Dhunës Seksuale në Konflikt, që përmes artit, fotografisë dhe rrëfimeve personale sjell përvojat e të mbijetuarve të dhunës seksuale gjatë luftës në Kosovë. Ushtruesja e detyrës së presidentes së Kosovës, Albulena Haxhiu, theksoi rëndësinë e njohjes së statusit të të mbijetuarve dhe nevojën për t’i trajtuar ata me respekt dhe dinjitet, duke luftuar stigma dhe heshtjen që kanë shoqëruar këto rrëfime edhe pas luftës. Ambasadori britanez Jonathan Hargrevas dhe ai gjerman Rainer Rudolph vlerësuan përkushtimin institucional dhe shoqëror për mbështetjen e të mbijetuarve, duke theksuar se trauma nuk ka afat dhe se ekspozita është një mënyrë e fuqishme për të rikthyer kujtesën dhe për të reduktuar stigmën. Përmes skanimeve të iriseve dhe portreteve, ekspozita sjell në pah dhimbjen, guximin dhe historitë unike të personave që përballuan dhunën, duke ftuar shoqërinë në një dialog të hapur dhe reflektues për të ardhmen.