Projekti operistik “Syrigana” i artistit kosovar Petrit Halilaj po përgatitet për prezantimin e tij në muzeun prestigjioz Hamburger Bahnhof në Berlin, si pjesë e programit jubilar për 30-vjetorin e këtij institucioni. Filharmonia e Kosovës, nën dirigjimin e Marco Crispo, do të interpretojë partiturën e kompozuar nga Lugh O’Neill, me soprano Nina Guo dhe Urta Haziraj, si dhe ansamblin “Don’t Listen to Your Neighbors”. Pas premierës së suksesshme në Kosovë gjatë verës së vitit 2025, “Syrigana” do të shfaqet në Berlin më 29 maj 2026 me dy shfaqje në orën 18:30 dhe 20:30. Ky projekt realizohet me mbështetjen e Ministrisë së Kulturës, Rinisë dhe Sportit të Kosovës, Ambasadës së Italisë në Berlin dhe Ambasadës së Kosovës në Berlin, duke shënuar një hap të rëndësishëm në promovimin e artit kosovar në skenën ndërkombëtare.