UBT është bërë institucioni i parë në Kosovë që ka marrë Quality Recognition nga AESOP, organizata evropiane që promovon cilësinë në edukimin dhe kërkimin në fushën e planifikimit hapësinor dhe urban. Kjo njohje vjen pas një rrugëtimi 20-vjeçar të Fakultetit të Arkitekturës dhe Planifikimit Hapësinor në UBT, i cili është zhvilluar në shkollën më të madhe të arkitekturës në vend. Programi Master në Planifikim Urban dhe Zhvillim të Qëndrueshëm është vlerësuar për kontekstin global të temave, bashkëpunimin ndërkombëtar dhe ndikimin në zhvillimin e qëndrueshëm urban dhe rajonal. Procesi i evaluimit nga “Excellence in Education Board” ka përfshirë analizën e pedagogjisë, përmbajtjes akademike, praktikave profesionale dhe ndikimit të programit në fushën e planifikimit hapësinor.