Universiteti i Prishtinës ka organizuar për herë të parë Shkollën Dimërore “Warm UP”, një iniciativë akademike që synon të institucionalizohet dhe të bëhet pjesë e kalendarit të rregullt akademik. Edicioni i parë zhvillohet nga sot deri të premten dhe përfshin ligjërata dhe punëtori të përbashkëta me profesorë nga Universiteti i Prishtinës dhe Universiteti i Luksemburgut. Kjo shkollë ka për qëllim avancimin e studimeve doktorale dhe forcimin e kërkimit shkencor, duke trajtuar tema si dizajnimi i programeve të doktoratës, sfidat e tyre, financimi i kërkimit dhe orientimi drejt nevojave shoqërore dhe industriale. Në kuadër të shkollës organizohet edhe një kolokium doktoral me studentët e Fakultetit të Inxhinierisë Elektrike dhe Kompjuterike, ku prezantohet puna kërkimore e tyre, ndërsa iniciativa mbështetet nga LuxDev dhe Ambasada e Mbretërisë së Luksemburgut në Kosovë.