Universiteti i Prishtinës hapi edicionin e 26-të të Universitetit Veror Ndërkombëtar, duke mirëpritur rreth 350 studentë nga Kosova dhe vende të ndryshme të botës. Ky program, që vazhdon të jetë një nga aktivitetet më të rëndësishme akademike ndërkombëtare në rajon, ofron 19 kurse dhe 12 punëtori ndërkombëtare, si dhe një gamë të gjerë aktivitetesh kulturore dhe studentore. Rektori Arben Hajrullahu theksoi rolin e këtij universiteti veror si promovues kryesor të ndërkombëtarizimit dhe bashkëpunimit ndërkulturor në Universitetin e Prishtinës. Gjatë dy javëve të ardhshme, pjesëmarrësit do të kenë mundësi të ndjekin ligjërata, debate, aktivitete sportive dhe ngjarje që nxisin shkëmbimin e përvojave dhe njohjen e Kosovës në arenën ndërkombëtare.